307
محمد نجيب كومينة
كاينين شي مقالعية كيدوزو حياتهوم كلها غير كيقلبو كيف يطلعوا بالاخرين، وبشعب كاع، و منهم هذا الكابرانات اللي حاكمين الجزائر اللي قاسمين بيناتهم وحاضيين بعضياهم واللي اغفل طارت عينيه ومشى فيها، والكتاب الله غادي يصدر قريبا بفرنسا غادي يطلعها عليهم وغادي يخليهم كلهم لابسين ليكوش،
وليني المشكلة هي ان دوك اللي كيتبلاو بتقوليب حتى كيولي عندهوم فالدم شي نهار كتدور ليهوم فلخوا و كيوليو بلا ما يشعرو كيقولبو فراسهوم، وهذا القالب اديال وقفوا الغاز اللي كيدوز من المغرب لاسبانيا والبرتغال الى شفنا مزيان وتمعنا مزيان هما اللي داروه لراسهوم و غادي تبين ليام باللي قالب مفلس، لان هدشي اديال الغاز كيكون بعقود اجلة، اي طويلة الامد، و ماشي بحال البترول اللي الثمن اديالو طالع نازل فبورصة البترول ولشاري والبايع كيربحو ولا كيتقسحو، وفي احسن الاحوال كاتكون شي حاجة اسميتها المقايسة indexation على ثمن البترول ولكن بدريهم او دريهمات، زعما شي لقطات، و لما تتدخل السياسة ومنطق الرشوة والتخلويض والتحراش عاودثاني قصة اخرى، كيمكن الشاري يولي ضاحك على البايع ومخليه لالحمار لاستة فرنك.
المغرب دابا اربح اكثر من 500 كلم من انبوب الغاز اللي دايزة من عندو وصبحات ملكو هاكاك في سبيل الله ما حط فيها حتى اريال ، هدية من تبون بتوصية من شنق ريحة ولحمامرة الله يجازيهم، والسبليون ماعندهوم ما يقولو على حقاش حافظين الكونترادا و عندهوم الناس بعقلهوم اللي كيعارفو باللي العقد شريعة المتعاقدين، وخا غادي يكونو كيعضو على سنانهوم وكيكولو واش هذا خياتنا اللي حاكمين الجزائر ماشي خصنا نصيفتو ليهم شي طبا يعالجوهم من البلادة والحقد.
الحاصول حفرو حفرة و طاحوا فيها ولهلا يقلب.
المتضرر الوحيد فالمغرب على حساب ردود الافعال اللي تبعثها هو صاحبي المبرع بوحدو اللي مشا كيقلب على لحطب على حقاش مسكين جاه البرد فمراكش، ويمكن حتى صاحبو مصطفى الزارعي على حقاش مبراد وموالف كيسخن بالفورنو هههه