الكوكب جمهورها راسمالها

عبد العزيز جلال 

الكوكاب فريق كبير لكنه عاش ازمات كتيرة ، ادت به أن يطيح لأقسام الظلمات الهواة، وبفضل الجمهور الوفي ديالها اللي دار مسيرة من المجلس الجماعي لمراكش حتى الولاية و اللي عرفات حضور أزيد من 11 ألف من مناصري الفريق كانت الرسالة واضحة، انقدو الفريق …
الحمد لله تجمعات الناس و خدمات ورجعات الهيبة للفرقة وخا فالهواة ولا كلشي تيتكلم على الكويكة بسبب التفاف الجميع حول الفريق و بسبب نتائج الفريق واصرارو على العودة سريعا و السبب المهم هو الحضور الجماهيري الكبير فاللقاءات و طرق التشجيع اللي خلات باز ديال الناس فالاعلام تتكلم عن جمهور يشجع بكل الطرق ويخلق الفرجة بالملعب الكبير و خارجه والفضل الكتير تيرجع لالترت الكريزي بويز اللي رجعات الحياة للمدرجات و صنعات الفرحة على قلوب اللاعبين
لكن اش وقع من بعد….الكوكاب تمنعات من جمهورها لعدة مقابلات داخل وخارج مراكش ، بدا الفيراج الجنوبي و كانه ساحة حرب بين بعض من محسوبي الالترا و اللي تايخلقو الفوضى فالمقابلات الأخيرة و اللي تتعطي سمعة خايبة على جمهور مراكشي دائما كان تيكون حضاري ، تكررات بزاف ديال المناوشات و الصراعات فالمقابلات السابقة ، لكن ما وقع فمقابلة الكوكب المراكشي ضد اتحاد تمارة فيه بزاف مايتقال، شكون اللي عندو الربح تنوض الفوضى بالفيراج وشكون اللي تابجي باش يرييب كل ما تبنى و شكون اللي تايحرم اللاعبين من الدعم ، حين اتقسمت الالترا و اصبح المعيور و السبان بيناتهوم فالوقت اللي كانو اللعابة تيتنظرو التشجيع و الحماس، ما وقع خلا بزاف ديال الناس يخرجو قبل الماتش و منين تقادا الماتش لقاو اللاعبين التيران خوا
كلشي هادشي بسباب الصراعات اللي عرفها الفيراج و اللي تاتعطي صورة مشينة على جمهور الكوكاب وهنا نتوجه للسلطة باش تضبط عملية الدخول و تفتش اللي داخل للتيران عيب نلقاو الجناوا فالتيران و أشياء اخرى
خص الجمهور ينتبه أن هناك من لا يريد خيرا بهدا الفريق و يكفي ماداز على الفرقة وعلى الترا الكريزي بويز تنظم راسها أكتر و تحكم بالاعضاء ديالها وتواصل مع السلطات إلا بأن ليها أن كاين اللي تايهدمها من الداخل
الكوكب محتاجة للجميع خصوصا في المقابلات المقبلة و خاصنا نحافظو على هاد الشغف الجميل في حب الكويكة و نعمرو التيران كيف كان من قبل فايام الحارثي وهاد المرة بالايقاعات المراكشية اللي تاتعطي نكهة للفراجة بدل صراعات الدراري الصغار