160
محمد نجيب كومينة
واش باقي فالننظام الجزائري شي واحد كيخدم مخو،باش يقول للهبال باركة من الضرب بالخاوي فالخاوي، راكم غير وما كتزيدو تخسرو و تتشوهو قدام العالم.
لعبوها زعما قوة ضاربة و بغاو يضغطو علىى اسبانيا باش تتراجع على قرارها الداعم للحكم الذاتي، وما فهموش معنى تصريح شانشيز بان الامر يتعلق. بموقف دولة وليس موقف شخص او حكومة، ماشافو الظرفية العالمية مافكرو ماحللو وهما يتدفكو يمشيو. بعيد للحافة. قررو الغاء اتفاقية التعاون وحسن الجوار بطريقة مجنونة، وكانهم يعلنون حربا، و بالزربة دازو لتوقيف المعاملات الاقتصاديية وتجميد ارصدة شركات اسبانية، وهما يلقاو راسهوم فوضعية مواجهة ماعندههوم لاجهد ولا ذكاء باش يدبروها مع اسبانيا، اللي قال ليهم وزير خارجيتها بالمباشر احنا ماكنتمازحوش، وزادت كبرات المواجهة اللي صبحات مع الاتحاد الاوروبي، اللي كيتولى في مفوضيتو العلاقات الدولية والامن وزير خارجية اسباني سابق، اللي جر ليهم ودنيهم مزيان، و صبحات مع الغرب كلو بعدما هبلو وناضو جابو فاشل بحالهوم اسمو مادورو وبداو كيلعبو معاه ومع ايران شي لعب ما حسبوش ليه حسابو، وصيفتو واحد لوزير لموريتانيا باش يحرض على افشال خط انابيب الغاز نيجيريا المغرب اوروبا اللي كتراهن عليه اوروبا واكيد تصرف بمنطق الرشوة اللي والفوه العساكر لما اطرح عليهم انبوب غاز ماغادي يكمل حتى تقوم القيامة وما يبقى لاغاز ولاهم يحزنون.
اوحيث الهبال غير هبال، ناضو اعطاو اخبارهوم للبراح المسطي اللي اسمو الدراجي ، وما قال واحد جوج حتى هز النافخ و اخرج كيفضحهم باللي غرضهم هو تنظيم انقلاب على الحكومة الاسبانية، وكانها حكومة في جمهورية من جمهوريات البنان،. و جاب ليه الله باللي 3مليار دولار شي حاجة مهمة بزاف فبلاد بحال اسبانيا اللي كتدير الناتج الداخلي الخام الجزائري اشحال من مرة بلا ماتعول على البترول، واللي غير معاملاتها التجارية مع المغرب كتوصل ل 16 مليار دولار.
و بعد ما تلقاو الهبال الصفعات وبدا كيبان ليهم باللي انقيل ما مسلكش والزربة غادي تجرهم الهاوية والشغل غادي يقساح الى ناض عليهوم النحل ، وهما واحلين حتى فالحليب والزيت والسميد والخضر،،،، وحتى فليصانص، وغير ذلك، ولاو دغيا راجعين اللور وكيطالبو اسماحة، و كيكذبو راسهوم، ودغيا سالات الرجلة والنيف وداكشي وارجع اجرو اجرو صداعو اكثر منو.
مع من تلاقينا.
هذا اللي دخل ليهوم لراسهم نحاربو المغرب وخا نخسرو كلشي، لان الخسارة وخا تكون مطلقة و تولي شوهة عالمية فهذا الحالة اربح، اخرج عليهوم، ويمكن ماكانش فراسو باللي شي نهار غادي تولي الجزائر محكومة بمشيرين بحال تبون وشنقريحة، كان الطبيعي يكونو فبويا عمار، وباللي تصطيا غادي توصل لحد ان دولة ولات كتخوض معاركها المصيرية والاستراتيجية والتاكتيكية، وهذي كلها مفاهيم كبيرة على الهبال، مع نشطاء في مواقع التواصل الاجتماعي و كتتخذ قراراتها كردود فعل عليهم.
اللي شاف شي يقول الله يستر، والله يبعد بلاهوم على بلانا، لهبيل كيفما درتي معاه وحلة.